Kawasaki ја проширува својата гама за 2027 година со новиот Versys 900, модел кој ја комбинира препознатливата сестраност на семејството Versys со перформансите на четирицилиндричниот агрегат од 948 кубика, позиционирајќи го како најспортскиот претставник во оваа серија досега.
Срцето на мотоциклот е агрегат инспириран од „Supernaked“ Z-моделите на Kawasaki, кој испорачува 122 КС (89,6 kW) при 9.500 вртежи во минута и максимален вртежен момент од 97,3 Nm при 8.000 вртежи во минута, обезбедувајќи рамномерна испорака на сила низ целиот опсег.
Новиот Versys 900 е изграден околу целосно нов челичен рам, дизајниран да понуди оптимален баланс на цврстина и прецизно чувство на предниот дел. Со дистрибуција на тежината од речиси 50:50, мотоциклот е насочен кон агилно управување, што е дополнително поддржано од комбинацијата на суспензија со долг од и 17-инчни тркала опремени со гуми Metzeler ROADTEC 01. Ергономијата е приспособена за исправена положба на седење, со можност за подесување на висината на седиштето од 825 mm до 845 mm и ветробран со седум позиции.
Технологија и опрема
Ова е првиот модел од семејството Versys што вклучува напредни системи за помош на возачот (ARAS), кои опфаќаат адаптивен темпомат (ACC Lite), систем за предупредување од судир (FCW) и детекција на мртов агол (BSD). Безбедноста е зголемена и со сигнал за итно сопирање (ESS). Возачите имаат на располагање 5-инчен TFT дисплеј во боја со поддршка за навигација и поврзување преку апликацијата Rideology, со два распореди на приказ: еден фокусиран на динамиката на агрегатот и втор кој приоритет им дава на навигацијата и информациите за мотоциклот.
Стандардната технолошка опрема вклучува и систем за управување во свиоци (KCMF), контрола на тракција (KTRC), напреден ABS, режими на работа на агрегатот, интегрирани режими на возење и брз менувач (KQS). За оние со ограничена возачка категорија, достапна е и верзија со 70 kW.
Дизајн и верзии
Дизајнерскиот концепт „Aero Edge“ му дава на мотоциклот лесен и динамичен изглед. Новиот систем за багаж вклучува топ-кејс со капацитет од 47 литри и странични куфери од 2 × 32 литри, кои се интегрирани во линијата на мотоциклот. Покрај стандардниот модел, достапни се и верзиите Tourer и Grand Tourer, како и SE изведбата. Versys 900 SE дополнително вклучува LED светла за магла, штитници за раце, греачи на рачките, заштитна решетка на ладилникот, слајдери за заштита на рам, долен спојлер и централен штендер.
Versys 900 ќе биде достапен во боите Metallic Spark Black и Pearl Robotic White, додека SE верзијата доаѓа во комбинациите Plasma Lime Green / Metallic Spark Black и Firecracker Red / Metallic Carbon Gray.
Коментари