BMW Motorrad подготви нешто навистина посебно за 100-годишнината од Nürburgring – три ексклузивни M модели посветени на легендарната германска патека.
BMW M 1000 RR, M 1000 R и M 1000 XR ќе бидат понудени во специјална „100 Jahre Nürburgring“ серија, а од секој модел ќе бидат произведени само по 100 примероци за целиот свет.
И уште на прв поглед е јасно дека ова не се обични M модели.
Зелено BMW не е нешто што се гледа секој ден, а особено не M 1000 RR во историската Nürburgring Green боја.
Токму зелената боја е заедничкиот визуелен потпис на специјалната серија и директна асоцијација на Nürburgring и неговиот добро познат прекар „Green Hell“.
Но BMW не застана само на бојата.
Сите три мотоцикли добиваат специјално обоен резервоар со силуета на Nürburgring, капак на airbox-от со јубилеен дизајн и индивидуална ознака „one of 100“, како и карбонски тркала со зелени детали. Тука се и црната задна вилушка и задната рамка, како и седиште во Alcantara изглед со извезен број „100“.
Во стандардната опрема на јубилејните модели е вклучен и M Track Package.
Три различни карактери, иста идеја
Најекстремниот во триото, секако, е BMW M 1000 RR – суперспортскиот модел создаден со максимален фокус кон тркачката патека, аеродинамиката и намалувањето на тежината.
BMW M 1000 R ја зема истата Superbike филозофија и ја префрла во hyper naked пакет, комбинирајќи огромни перформанси со поедноставен и подиректен карактер.
Третиот модел, BMW M 1000 XR, е поинаква интерпретација на истата идеја – високи перформанси и стабилност при големи брзини, но во пакет кој нуди и далеку подобра употребливост за подолги патувања.
За M 1000 RR и M 1000 R BMW дополнително вклучува M Cover Kit, специјална M подлога со „100 Jahre Nürburgring“ лого и paddock stand за задното тркало.
Врска со Nürburgring уште од 1927 година
Изборот на Nürburgring за ваква серија не е случаен.
Врската меѓу BMW Motorrad и патеката започнува уште во 1927 година, кога BMW ја забележал својата прва победа таму.
Денес Nordschleife, со должина од 20,8 километри, 73 свиоци и огромни промени во надморската височина, останува едно од најтешките места во светот за развој и тестирање на возила.
Токму таму BMW ги тестира суспензијата, моторите, аеродинамиката, сопирачките и термичкото однесување на своите најдобри модели.
Затоа и мотото на целата јубилејна серија звучи прилично соодветно: „Born on the Racetrack. Made for the Streets.“
BMW засега не ги објави цените ниту точниот почеток на продажбата на трите модели, а информациите за нарачки и достапност ќе бидат соопштени дополнително.
Со само 100 примероци од секој модел, сепак, едно е сигурно – и без зелената боја, ова нема да бидат BMW мотоцикли што често ќе ги среќаваме на улица.
Коментари