Половината од мај веќе измина но временските услови сеуште наликуваат на крајот од зимата, па еден од ретките сончеви денови го искористивме за првиот тест во сезоната 2011, тест на Honda SH125i.
Новиот модел на најпродаваниот скутер на Honda, SH125i неодамна пристигна на македонскиот пазар. Доколку она "најпродаван" не ви звучи доволно убедливо, ќе споменеме дека на италијанскиот пазар (кој важи за најголем пазар на скутери во светот) Honda од претставувањето на првиот модел во 1984 до сега има продадено повеќе од 550.000 вакви скутери!
Што го прави овој скутер толку привлечен за купувачите? На прв поглед ништо посебно, големи тркала, висока положба за седење, тесни рачки.. но сето тоа се менува во првиот момент кога ќе ја навртите рачката за гас. Веднаш разбирате зошто јапонците важат за светски лидери во производството на моторцикли и скутери.
Четворотактниот мотор со вбризгување на горивото функционира ефикасно и безгрешно. Моќта ја пренесува брзо благодарение на V-Matic преносот, а воденото ладење ќе се погрижи и при најголемо оптоварување на моторот да не осетите омалаксување на силата. Она што не импресионираше е моќта на овој елегантен скутер при било каква нагорнина. Дури и со сопатник на стрмен пат нема да имате потреба да го поттурнувате со нозете или пак да се грижите дали ќе стигнете до целта.
Карактеристично за скутерите кои имаат голема моќ е зголемената потрошувачка што не е случај со SH125i. Резервоарот со капацитет од 7.5 литри е доволен за да изминете околу 240км, што го вбројува во класата на нај економични скутери. Потрошувачката се зголемува незначително доколку го возите со поголема брзина, нешто што нема да ви претставува проблем имајќи го во предвид забрзувањето кое го нуди скутерот и брзината од 100км/ч што ја достигнува без проблем.
Брзината што ја споменавме одлично се скротува со кочиониот систем CBS на Honda. Кај SH125i тој е составен од преден и заден диск, а она што е интересно е дека предниот диск доаѓа со троен систем од кој двата клипа се вклучуваат при кочење со предната кочница, а третиот кога ќе ја притиснете рачката од задната кочница што придонесува за рамномерно и сигурно кочење. Комбинираниот начин на кочење е карактеристичен за поголемите моторцикли па CBS и хидрауликата кај SH125i ја зголемуваат репутацијата на скутерот на скалата од 1 до 10.
Скутерот е навистина лесен за возење, па секое негово придвижување ќе ви причинува задоволство благодарение на неговите 16 инчни тркала, Dunlop гумите и пространото место за нозете. Вашиот сопатник ќе ужива во ногарките кои се широки и притоа се поставени на идеално место, а за целосен третман тука е седиштето кое е меко и доволно големо при возењето да не се осеќате како сардини.
Кога сме кај тркалата да напоменеме дека токму нивната големина допринесува за удобното возење. Тука е и предницата на која познавачите ќе препознаат систем стар и повеќе од една деценија но како што велат искусните "тимот што победува не се менува". Изненадувачки е тоа што скутерот истовремено се вози лесно како мало скутерче со кое и во најтесните улички ќе го најдете патот до семафорот, а по нерамнините се однесува како макси скутер. Одличната суспензија е онаа која ќе ви помогне да не ги осетите сите дупки и лошиот асвалт на нашите патишта.
Забелешка даваме на просторот под седиштето во кој можете да сместите само отворена кацига, но не фул-фејс или флип-ап. Препорачуваме набавка на куфер (кој може да се нарача во иста боја како каросеријата) кој сигурно ќе ви се најде во секојдневните активности. Тежината од 127кг би претставувала проблем доколку агрегатот е послаб но во случајов тоа воопшто не е негативна страна.
Срдечно го препорачуваме скутерот на сите оние кои урбаниот живот им е секојдневие, оние кои имаат постојана работа од едниот до другиот крај на градот, а притоа не сакаат да го поминат целиот ден чекајќи на семафори во своите автомобили. Honda SH125i е скутер кој никогаш нема да ве изневери, со него сигурно и брзо ќе пристигнете до саканата дестинација, притоа уживајќи во возењето. Можеби изгледот не му е најсилна страна, но нам ни се допаѓа технологијата, управувањето и комфорот. Има одлична потрошувачка на гориво и кочници кои ви ја гарантираат безбедноста, нешто што ќе допринесе да осетите дека го контролирате скутерот и дека сте безбедни. Ете зошто SH125i е најпродаван скутер на Honda.{gallery}sh125i{/gallery}
| Општи информации | |
|---|---|
| Модел: | Honda SH125i |
| Година: | 2011 |
| Категорија: | Скутер |
| Рејтинг: |  |
| Цена: | 2.990 € |
| Мотор и пренос | |
| Зафатнина: | 125.00 ccm |
| Тип на мотор: | Еден цилиндар, четворотактен |
| Моќност: | 13.00 HP (9.5 kW)) @ 9000 RPM |
| Торзионен момент: | 11.50 Nm (1.2 kgf-m) @ 7000 RPM |
| Компресија: | 11.0:1 |
| Бензински систем: | Вбризгувачки, PGM-FI EFI |
| Контрола на гориво: | SOHC |
| Палење: | Електронско |
| Систем на ладење: | Течност |
| Пренос: | Каиш (V-matic) |
| Шасија, суспензија, тркала и кочници | |
| Предна суспензија: | 33mm телескопски вилушки, 89mm оскино вртење |
| Задна суспензија: | Двојни амортизери |
| Предна гума: | 100/80-16 |
| Задна гума: | 120/80-16 |
| Предна кочница: | Единечен диск |
| Дијаметар на предниот диск: |
240mm x 4mm еден перфориран диск со комбинирани хидраулични троклипни клешти и плочки |
| Задна кочница: | Единечен диск |
| Дијаметар на задниот диск: | 240mm x 5mm еден диск со хидраулична едноклипна клешта и синтерни плочки |
| Wheels: | U-section 5-spoke cast aluminium |
| Димензии и капацитет | |
| Тежина: | 127.0 kg |
| Висина на седиште: | 785 mm |
| Вкупна висина: | 1,230 mm |
| Вкупна должина: | 2,025 mm |
| Вкупна ширина: | 728 mm |
| Висина на под: | 150 mm |
| Меѓуоскино растојание: | 1,335 mm |
| Капацитет на резервоарот: | 7.50 литри |
