Ознаката „M“ на BMW долго време е синоним за врвни перформанси во автомобилскиот свет, а во последните години успешно се етаблираше и во гамата на BMW Motorrad со моделите M 1000 RR, M 1000 R и M 1000 XR. Иако германскиот производител сè уште официјално не го потврдил моделот, новите шпионски фотографии од развојните центри на компанијата укажуваат дека пристигнува M 1300 GS, кој ќе биде нов предводник во сегментот на авантуристичките мотоцикли.
Прототипот на новиот модел, кој е снимен од фотографот Бернхард М. Хоне, се наоѓа во напредна фаза на тестирање. За разлика од некогашната верзија R 1250 GS HP, која главно се потпираше на козметички измени, претстојниот M 1300 GS претставува сериозен дизајнерски потфат насочен кон подобрување на теренските способности.
Фото: ADV Pulse
Фокус на теренски перформанси
Најзначајната промена кај овој примерок е преминот кон комбинација од предно тркало од 21 инч и задно тркало од 18 инчи со жици, што јасно укажува на намерата на BMW да го позиционира M моделот како машина со уште поголеми можности за возење надвор од асфалтот. Прототипот е опремен со гуми Metzeler Karoo, а видливи се и подолг од на суспензијата, засилена и ревидирана поддршка на задната вилушка, како и M сопирачки со препознатливата сина завршница. За разлика од верзијата R 1300 GS Adventure, се очекува M моделот да го користи помалиот резервоар за гориво од стандардниот R 1300 GS, со цел да се заштеди на тежина и да се подобри распределбата на масата.
Фото: ADV Pulse
Погонски агрегат и технички детали
Воденo-ладениот боксер агрегат од 1300 кубика останува речиси непроменет во однос на стандардниот R 1300 GS. Неговиот вртежен момент од 149 Nm при 6.500 вртежи е повеќе од доволен, а инженерите би можеле да извлечат дополнителна моќност над сегашните 147 КС при 7.750 вртежи, иако тоа не е неопходно со оглед на очекуваното намалување на тежината преку употреба на материјали како титаниум за издувниот систем. Шпекулациите вклучуваат и ревидирано седиште и преработена задна рамка, а не би било изненадување доколку се отстранат предните и задните радарски единици за дополнително намалување на тежината.
Фото: ADV Pulse
Позиционирање на пазарот
BMW очигледно цели кон тоа M 1300 GS да биде најагресивната теренска варијанта во GS семејството, претворајќи го од класичен патнички ендуро во машина со високи перформанси способна за секаков терен. Како и кај останатите M модели, се очекува овој мотоцикл да биде на врвот на боксер гамата, како по способностите, така и по цената. За споредба, моделите M 1000 XR и M 1000 R се за околу 7.300 до 11.000 евра поскапи од нивните најблиски варијанти, што сугерира дека и M 1300 GS би можел да следи слична ценовна разлика.
Пред пристигнувањето на M моделот, BMW наводно подготвува благо освежување на стандардниот R 1300 GS, што би можело да се случи уште на почетокот на есента. Иако официјален датум за лансирање на M верзијата сè уште нема, европските медиуми известуваат дека премиерата пред почетокот на сезоната 2027 е многу веројатна.
Коментари