MotoGP 2026: Кој е најлесен, кој најтежок – а кој највисок?

Според официјалните податоци објавени од MotoGP.com, новата сезона ни носи прилично интересен распоред кога станува збор за физичките параметри на возачите. На двата краја од скалата се новајлијата Диого Мореира, новиот возач на LCR Honda, и светскиот шампион од WSBK кој премина во MotoGP, Топрак Разгатлиоглу. 

Мореира е најлесниот возач на гридот со 60 килограми – вредност што ја дели со Аи Огура. На спротивниот крај е Топрак, кој со 80 килограми е најтежок во класата, и тоа со значителна разлика од дури 11 килограми повеќе од следната група возачи (Марини, Алдегуер, Мир и Квартараро – сите по 69 кг). Притоа имајте на ум дека Марини е само еден сантиметар понизок од Топрак. 

Дополнително, Топрак е и највисок – 185 сантиметри, додека најниски на листата се Хорхе Мартин и Енеа Бастианини со 168 см.

За разлика од Moto2 и Moto3, кај MotoGP класста сѐ уште нема комбиниран минимум (возач + мотор). Ова е тема што ја отвора Марини веќе неколку сезони, објаснувајќи дека вистинскиот проблем не е забрзувањето, туку оптоварувањето на гумите кај потешките возачи. 

2026 изгледа ќе биде сезона во која физичките разлики меѓу возачите ќе бидат поголеми од вообичаено — од „пердув-лесниот“ Мореира до тешкашот Топрак.