Наместо да ни платите за реклама, помогнете им на македонските возачи!

Motori.com.mk започнува иницијатива за поддршка на македонскиот мотоспорт. На компаниите што ќе им помогнат на нашите возачи им нудиме бесплатен рекламен простор на порталот. Парите не ги сакаме за нас. Сакаме да завршат таму каде што се најпотребни - кај луѓето што се борат да стигнат до следната трка.

Во Македонија имаме талентирани возачи. Имаме шампиони, имаме млади деца што допрва почнуваат да се тркаат, имаме луѓе што секој викенд патуваат стотици километри за да настапат на некоја трка.

Но имаме и еден проблем за кој сите знаеме, а премалку зборуваме - парите.

Мотор, опрема, гуми, гориво, транспорт, котизации, резервни делови... Сето тоа чини. И многу често нашите возачи, односно нивните родители и семејства, сами го носат целиот товар.

Некој ќе се откаже од трка затоа што нема пари за пат. Некој ќе вози со стари гуми. Некој талентиран млад возач можеби никогаш нема да добие вистинска шанса да покаже што знае.

Не можеме сами да го решиме тој проблем. Но можеме да направиме нешто.

Наместо реклама на Motori, поддржете наш возач

Идејата е едноставна.

Ако имате компанија и сакате да се рекламирате на Motori.com.mk, имам предлог за вас: наместо парите да ги дадете за реклама кај нас, вложете ги директно во некој македонски возач.

Ние за возврат ќе ви обезбедиме бесплатна реклама на порталот.

Годишен рекламен пакет на Motori.com.mk има вредност до 2.000 евра. Но наместо тие пари да завршат кај нас, сакам да завршат кај нашите возачи.

Не бараме провизија, не собираме донации и не сакаме парите да поминуваат преку нас. Вие директно му помагате на возачот, а ние ќе ви обезбедиме рекламен простор во зависност од обемот и времетраењето на поддршката.

И не мора да станува збор само за пари.

Некому му треба мотор. Некому сет гуми. Некому масло, опрема, резервни делови или транспорт до следната трка.

Секоја помош е добредојдена.

Не очекуваме сите компании да вложат 2.000 евра. Секој може да помогне колку што може. Секако, компанија што финансира цела сезона ќе добие поголемо рекламно присуство од фирма што обезбедила еден сервис. Но сакаме да ја препознаеме и најмалата помош, затоа што на некој возач токму таа може да му биде пресудна.

Што добиваат компаниите?

Motori.com.mk постои од 2007 година. Речиси две децении пишуваме за моторите, трките, мото светот и локалната сцена.

За сите овие години изградивме публика што има една заедничка работа - љубовта кон моторите.

Еве ги вистинските бројки за последните шест месеци, од 7 мај до 6 ноември 2026 година:

Извор: Google Analytics 4, период 7 мај – 6 ноември 2026 година.

Ова не се случајни посетители. Ова е публика на специјализиран мото-портал, најголемиот дел од Македонија. Луѓе што следат трки, се интересираат за мотори, опрема и сè што е поврзано со моторџискиот свет.

И токму на таа публика сакаме да им ги претставиме компаниите што ќе застанат зад нашите возачи.

Вие помогнете им на нашите возачи. Ние ќе ви помогнеме вашата поддршка да ја видат илјадници луѓе.

Triumph Македонија веќе покажа како се прави тоа

Неодамна пишувавме за поддршката што Triumph Motorcycles Skopje му ја дава на Христијан Илиоски – Кико и за неговите шампионски резултати.

Тоа е пример што заслужува почит.

И токму таа приказна ме поттикна да размислам: зошто вакви примери да нема повеќе?

Зошто и други компании да не помогнат на некој наш возач? Зошто да не создадеме нешто што ќе ги поврзе фирмите со луѓето на кои им е потребна поддршка?

Не мора секој да обезбеди мотор. Не мора секој да вложи илјадници евра. Но ако десет компании помогнат на десет возачи, тоа веќе може да направи вистинска разлика.

Не ги бараме само шампионите. Ги бараме и идните шампиони.

Оваа иницијатива не е само за познатите имиња.

Напротив, особено сакам да им помогнеме на младите возачи што допрва почнуваат, на децата што имаат талент и желба, но немаат доволно средства.

Без разлика дали возите мотокрос, брзински трки, ендуро или друга мото-дисциплина, сакаме да слушнеме за вас.

Ако активно се натпреварувате и ви треба поддршка, пишете ни. Кажете ни кои сте, каде се тркате, што сте постигнале досега и што ви е потребно за следната сезона.

Планираме да отвориме посебен дел на Motori.com.mk во кој, со согласност на возачите или нивните родители, ќе ги претставиме оние што бараат поддршка.

Така секоја компанија што сака да помогне ќе може да види кому и како може да му помогне.

Можеби некому му недостигаат само 200 евра за да стигне до следната трка. Можеби некому му треба сет гуми. А можеби некое талентирано дете чека некој да му даде шанса.

Ги повикуваме и другите медиуми да ни се приклучат

Ова не мора да остане иницијатива само на Motori.com.mk.

Ги повикувам и другите македонски портали, медиуми и сите што имаат можност да помогнат, да се вклучат.

Пренесете ја оваа приказна. Споделете ја. А ако можете, понудете и вие бесплатна реклама на компаниите што ги поддржуваат нашите возачи.

Замислете колку повеќе фирми би се заинтересирале кога би знаеле дека нивната помош ќе биде препознаена на повеќе места.

Не е важно кој прв ја започнал иницијативата. Важно е што ќе направиме со неа.

Ајде да направиме нешто за нашите моторџии!

Motori.com.mk го правам од љубов кон моторите уште од 2007 година. Никогаш не сум го гледал порталот како начин да заработам пари.

И ако после сите овие години успеам преку него да му помогнам барем на едно дете да ја вози својата прва трка или на еден наш возач да стигне до подиумот, тоа ќе вреди повеќе од која било реклама.

Затоа, ако имате фирма и можете да помогнете - пишете ни.

Ако сте возач и ви треба поддршка - пишете ни.

Ако познавате компанија што би сакала да се вклучи, испратете ѝ го овој текст.

Не бараме ништо за нас. Само сакаме повеќе наши возачи да имаат шанса да се тркаат.

И кој знае, можеби токму со ваша помош некое дете што денес сонува да стане шампион, утре ќе го развее македонското знаме на победничкиот подиум.

Ајде да направиме нешто добро за македонскиот мотоспорт. Заедно.

Благоја Мартиновски
Основач и уредник на Motori.com.mk

Сакате да помогнете или ви треба поддршка?

Без разлика дали сте компанија што сака да помогне или возач што бара поддршка, пишете ни. Ќе се потрудиме да ги поврземе вистинските луѓе.

Е- маил: Оваа е-адреса е заштитена од спамботови. Треба да ви е овозможено JavaScript за да ја видите.

Или испратете порака преку нашата контакт-форма.