Постојат гласини дека Yamaha работи на „full-fairing“ верзија на нивниот популарен MT-07 уличен мотоцикл.
Според информациите, компанијата сака на пазарот да престави машина која ќе биде директен конкурент на Aprilia RS 660 кој во моментов е единствениот „full fairing“ мотоцикл кој спаѓа во средната класа.
На мотоциклите кои се дел од МТ-07 линијата не им е непозната тркачката патека. Како што можете да видите од фотографијата, на FZ-07R тркачките мотоцикли добро им се познати гаражите од МотоАмерика и тие веќе подолг период се дел од ова натпреварување.
Главната причина за ваквата одлука се чини дека е пензионирањето на Yamaha YZF-R6, која ќе остави голем простор во линијата на мотоцикли на Yamaha, особено во спортскиот сегмент.
MT-07 машините се одлични улични мотоцикли а во исто време и компетентни тркачки машини кога соодветно ќе се надградат. Од компанијата сметаат дека доколку кај MT-07 се направат одредени промени и се искористат побрзи делови, машината ќе стане уште подобра.
„Full-fairing“ моделот ќе се најде над MT-07 во линијата на мотоцикли на Yamaha а веројатно ќе има и повисока цена. Сепак, и со тоа се очекува да чини помалку од R6.
Иако во моментов R6 е се уште влијателен во суперспорт категоријата, Yamaha би можела да го искористи овој „MT-07R“ како начин да се задржи во „Twins“ класата.
Ќе мораме да почекаме за да видиме дали оваа информација на крајот ќе се покаже како точна.
