Honda Racing Corporation (HRC) официјално потврди дека Диого Мореира ќе му се приклучи на фабричкиот тим Honda HRC Castrol за сезоната 2027 во MotoGP шампионатот. Бразилецот потпиша повеќегодишен договор и ќе настапува како тимски колега на Фабио Квартараро во период кога шампионатот преминува кон нови технички правила.
Дваесет и двегодишниот Мореира, кој во MotoGP дебитираше во 2026 година, во фабричкиот тим доаѓа од редовите на LCR Honda. Неговиот пат до врвот е обележан со освојувањето на титулата во Moto2 во 2025 година, по неговата прва победа во средната класа во Асен, што беше негова четврта сезона на светската сцена, а во кариерата досега има забележано вкупно 5 победи, 13 подиуми и 9 пол-позиции во лесната и средната класа.
Мореира, кој настапува со бројот 11, во светскиот шампионат влезе во 2022 година. Неговата прва сезона во кралската класа со Honda RC213V беше искористена за постепено прилагодување, што резултираше со првиот пласман во топ 10 на трката за Големата награда на Каталонија, како и дебитантски подиум во спринт-трката во Мотеги. Со овој ангажман, Мореира станува вториот Бразилец во фабричкиот тим на Honda во кралската класа, по Алекс Барос, кој во 2004 година со Honda RC211V оствари четири подиуми.
Јузуру Ишикава, генерален менаџер на тркачката дивизија на HRC, истакна дека способноста на Мореира брзо да се прилагодува на различни машини – од мотокрос до Moto3, Moto2 и MotoGP – е клучен фактор за неговиот напредок. „Целта на HRC е да го поддржи Диого во следната фаза од неговата кариера и во нашиот план за враќање во борбата за титулата. Со оваа возачка постава сакаме да ги поттикнеме инженерите да го создадат најдобриот можен мотор за новата ера на тркање“, изјави Ишикава.
„Фантастично е чувството да се стигне до фабричкиот тим на Honda во MotoGP, нешто за што секој возач сонува уште од мали нозе. Благодарен сум за довербата и со нетрпение очекувам да му помогнам на Honda HRC да се врати таму каде што припаѓа.“ Диого Мореира, возач
Со ова, се потврдува и дека Давид Алонсо оди во тимот на Хонда ЛЦР каде ќе биде клубски колега со Жоан Зарко.
Коментари