Alpinestars ја претстави својата најнова спортска кацига S‑R7, модел кој ја носи ДНК‑та на премиум серијата S‑R10, но во поразумна и попристапна форма за секојдневните возачи. Оваа кацига е создадена да понуди врвна заштита, стабилност на високи брзини и тивко возење – нешто што ретко се добива во спортски ориентиран модел.
Конструкција и безбедност
S‑R7 користи мулти-композитна школка составена од карбон, арамидни влакна и фиберглас, врзани со напреден pre‑preg епоксиден процес. Оваа комбинација овозможува висока отпорност на удар, мала тежина и одлична структурна цврстина. Кацигата е ECE 22.06 и DOT хомологирана, што значи дека ги исполнува најновите и најстроги стандарди за безбедност.
Alpinestars ја вгради и својата PLASMA технологија, специјално развиена за подобра апсорпција на ротациски удари. Дополнително, школката има засек кај клучната коска за да се намали ризикот од повреда при лизгање – детал што го гледаме само кај највисоката класа спортски кациги.
Аеродинамика и тишина
Една од најпофалените карактеристики во видео‑рецензите е неочекуваната тишина. Иако S‑R7 е спортска кацига, аеродинамичкиот профил е дизајниран без надворешни канали кои би создавале турбуленции. Интегрираниот заден спојлер и страничните крилца се развиени во воздушен тунел и значително ја стабилизираат кацигата на високи брзини.
Вентилација и визир
S‑R7 има 10 отвори за вентилација – шест влезни и четири излезни – со што обезбедува одличен проток на воздух. Горниот лизгачки механизам отвора три канали за максимално ладење, а делот кајбрадата има три независни отвори за насочување воздух кон визирот.
Визирот е со оптичка класа 1, со варијабилна дебелина од 1.6 до 2.6 мм за подобра отпорност. Доаѓа со Pinlock 120XLT вклучен во пакетот, а механизмот за отворање е брз, сигурен и има метална бравичка за дополнителна стабилност.
Комфор и прилагодување
Внатрешноста е целосно вадлива, пералива и антибактериска. Најинтересниот дел е A‑Head системот, кој овозможува прецизно подесување на висината и аголот на седење на кацигата – нешто што ретко се гледа во оваа класа. Падовите имаат канали за очила и можност за инсталација на хидратациска цевка, а кацигата е подготвена и за A‑Connect комуникациски систем.
Alpinestars S‑R7 е кацига која успева да ги спои спортските перформанси со удобност и тишина што ја бараат уличните возачи. Со напредна конструкција, одлична аеродинамика и врвни безбедносни стандарди, овој модел претставува сериозен избор за оние што сакаат премиум чувство без да влезат во најскапата класа.
Величини и достапни конфигурации
Alpinestars S‑R7 е изработена во три различни големини на школка, што овозможува попрецизно вклопување и подобра распределба на тежината. Овој пристап значи дека секоја големина на кацигата има оптимална пропорција, без непотребно зголемување на волуменот или компромис во аеродинамиката.
Моделот е достапен во широк опсег на големини – од XS до 2XL, што ја прави соодветна за голем број возачи. Кога станува збор за изгледот, S‑R7 дстартува со 4 бои. Црнамат и сјај, сива и бела. Веруваме дека во иднина ќе се збогати оваа понуда со повеќе различни богати графички решенија.
На крај останува за заклучиме дека Alpinestars во својата понуда со овој модел вклучи поефтина варијанта на нивниот хит S‑R10. Цената на светските пазари е нешто повеќе од половина од премиум моделот.
Коментари