Суспензионскиот гигант WP прави чекор кон сопирачките системи, претставувајќи 19 нови компоненти наменети директно за мотоцикли со високи перформанси.
Со децении, WP е синоним за суспензија и техничка поддршка зад KTM и други премиум производители. Сега австриската компанија сака да има збор и во тоа што всушност ги запира мотоциклите.
WP официјално го лансираше WP Braking Systems, ново семејство од 19 сопирачки компоненти развиени специјално за високоперформансни OEM‑апликации. Ова не е експеримент или страничен проект. Според WP, одлуката за влез во светот на сопирачките произлегла од потребата за систем целосно проектиран според специфичните барања на KTM, наместо прилагодување на готови решенија од трети добавувачи.
За таа цел, компанијата оформила внатрешен тим од 11 специјалисти за сопирачки системи, секој со повеќе од 20 години искуство. Тимот е поддржан од целосна CAD-развојна инфраструктура, капацитети за изработка на прототипи и валидација, сместени во производствен објект со површина од 6.000 квадратни метри.
Клучниот поим овде е „целосна вертикална интеграција“. WP го контролира целиот процес во сопствена режија – од плетење и екструзија на хидраулични црева, преку машинска обработка и анодизација, па сè до финалната монтажа. Компанијата дури располага со наменска линија за анодизација долга 100 метри, специјално за површинска обработка.
Производствениот капацитет е поставен на околу 300.000 комплети сопирачки системи и 1,5 милиони сопирачки црева годишно, што јасно покажува за каков обем и амбиција станува збор.
Самата хардверска понуда силно се фокусира на намалување на масата и ефикасно управување со топлината, со цел обезбедување врвни сопирачки перформанси и кај големи, и кај мотоцикли со помал работен обем. Еден од главните адутни производи е новa радијална предна кочна клешта со четири клипа, со тежина од само 740 грама. Таа користи компактен централен мост за максимална цврстина, додека истовремено останува доволно тесна за употреба со тркала со жици.
Материјалите и завршната обработка се целосно во чекор со конкуренцијата: тела од лесен алуминиум, клипови од тврдо анодиран алуминиум, квадратни и заштитни заптивки од EPDM, како и избор помеѓу синтерувани и органски плочки.
WP исто така претставува нов радијален главен цилиндaр наменет за класи со помал работен обем, носејќи технологија инспирирана од трките во сегменти кои обично располагаат со поедноставни решенија.
Иако официјално се наведува дека овој потег е резултат на потребите на KTM за „наменски изработени“ сопирачки, тешко е да се игнорира и финансискиот аспект. Финансиските предизвици на KTM можеби се намалуваат, но сè уште не се целосно зад огледалото. Со преселување на производството во рамките на WP, KTM ја намалува зависноста од надворешни добавувачи како Brembo или J.Juan.
Дополнително, постои и можност овие сопирачки системи да им бидат понудени и на други производители – потег кој би можел дополнително да помогне во стабилизирање на финансиската состојба.
Коментари